Ternyate bedoe kance perlu lamunte bekelampan - cerite sasak

Kocap cerite Tuaq Buling lalo lampaq-lampaq jok daerah lain. E wah dines ceriten masih peteng wahne saq siepan tas dait koper. Ndekne lupak bekace, bejerik dait kadu minyak sengeh.

Osapne alisne telu kali sik inen imene, "Angin uluh belabur eat, hem". Unine bekerem pasang doe.

Coba ngemus sekediq, "wah,  gantengke ternyate", ye unin leq dalem angenne. "Karing sejam setenge, mudahanke ndeq  telat dateng BIL bares, untung saq wah te cek in an uiq, endeqte saq gupuh laloq". Uninne.

Beterusne besalam leq epen balene, "Apiq-apiq ariq entan jagaq bale, lemaq hadiahanm tondang aneh saq oleq", ye ongkatne kene epen balene. "Side dendeq liah doang pedasan ceweq to, mudahande selamet sampe tulaq", ongkat seninene sambil siduq ime. Puqne lampaq tuaq Buling antih taksi leq sedin rurung.

Tuaq Buling  : "Stop ! Stop! Jok BIL ngiih, baun endeq kadu argo, pire ongkos?"
Supir             : "Baun, Karo belah pak".
Tuaq Buling  : "La kemahelne, satus wah aneh, kan wah biase ye ongkos langan mentaram jok BIL".
Supir             : "Kan begaq jaoqne pak, romboqne wah aneh selae".
Tuaq Buling : "Kan wah entun bensin uiq, satus wah aneh, adiqne pas itunganne aranne".
Supir            : "Hehe, Taeq wah aneh meno jaq".

Sengajen tuaq Buling endeq mele kadu argo adeqne saq muraqan.  Kode endah ongkatne beregaq. Takut tedengah sik wartawan atau media-media saq ngeliput  berita. Aran dengan paran dikne jari bintang pelem ceriten. Takutne te beritaan lah.

Sampe BIL langsung taeq joq lante paring atas langan lip, endeqne mele langan anjah, beruntung endeqne telat. Karing 10 menitne jaq lampaq kapal. Aduh, ternyate lupaqne nai oneq klemaq, saking takutne telat. Laguk nani taoqne mele nai.

"Idiq, nyalaqke nani ne, melengke nai, jadiq jamaq jari buit, ye wah upaqke saq becat doang oneq. Kapal wah karingneq lampaq doang ne. Aneh bares saq dateng bae taoq nai to". Unin Tuaq Buling ngerumun mesaq.

Beterusne peritoq petugas boardingpass ne puqne taeq kapal. "Lah, untungke mauq leq atas keleteq, paling demenke tokol leq atas kleteq," unin tuaq buling.

Dengan tuaq Bulinge ceriten demen laloq gitaq kleteq kapal saq nguit sekediq-sekediq bakat siq angin. Maraq ruen cowoq saq dadahan ceweq. Angenne endah adeqne  molah nyelontaq  pelai langan kleteq mun araq kejadian darurat, sengaq biasen arak lawang darurat leq bagian kleteq.

Wah dateng okep saq lante ke 4 jok atas, pedas idapne kapal tie nengkesur solah maraq tuselaq.  Ngengatne tuaq Buling kiri kanan. Pramugari masih ngerep ruen.

"Te toilet kapal bae taoq nai maeh, eeesppppp, endeq tahen idapne ne", unine. Terusne toes langan kursine. Bukaqne sabuq pengaman. "Tabeq pak enggih, jok toilet juluq", ongkat tuaq Buling.

Beterusne tebeng liwat siq dengan saq tokol leq lempengne. Adeng entanne lampaq. Bedurus jok tuuu plaing muri. Puqne bukaq toiletno.

"Wah nyalaqte ne, mangkaqne ndaraq aiq, tisu doang. Wah endeqte tao idapne ne jaq. Ekeq laloq idapn. Aneh bares bae aneh meno jaq. Sakit prase jamaq." Ongkat tuaq Buling puqne tulaq jok kursine.

Biase dengan tuaq buling tetap jagaq kebersihan, endeqne mele maraq turis saq bebesoq kadu tisu doang. Endeqne biase endah ye siqne enteq tao.

Konteq Cerite dateng Jakarta tuaq buling langsung pete WC. Dateng dalem WC bingungne. "Nyalaqte nani ne, mbe taoq jaq gantungne Koperke. Andente kance batur jaq araq jari jagaqante". Unin ngerumun.

Cobaq lepasne koper leq julun lawang WC. "Bares telang koperne nyalaqte". Unin. Leq bungkaqne neket tas maraq ruen kura-kura ninja jarin. Mbene berat endah tas tie.

Cobaq ketuanne tukang kebersihan WC saq nganjeng leq julun lawang. "Pak, bisa titip koper",ongkatne. "Wah, kalau ada barang berharga saya takut nanti terjadi hal-hal yang tidak diinginkan", jawap petugasno.

Pasrahne tuaq buling puqne poloq tas kance koperne lek dalem WC. WC tie kodeq gati sekitar semeteran. Biase WC bandara tepedereq luek-leuq. Angkaq bis basaq koperne leq bagian bawaq, soalne leq lante WC taoqne polok.

Sugul-sugul tuaq Buling pedas ruen along ke susahne, saq wah sugul pengerembengne. Terusne bae lampaq durus koridor bandara maraq tandang Syahrul Khan, gagah idapne.

Solone lampaq ngerumun mesaq. "Eh, ternyate penting kance batur bekelampan. Munte mesaq ndeq tao lalo meneq, apelagine jak penoq bandarante, nyeselke endeq tenaq epen baleno uiq jari kancente." Unine lek dalem angen.

"Piran jaq saq bekance, baunte sembayang endah leq musolla, araq kancente saling jagaqan barang. Arak kancente polaq duaq ongkos taksi endah". Unine.

(Fiksi semata, hanya untuk hiburan)

Bersambung....