Pentingne turut perkembangan zaman - Cerite sasak

Cerite juluan...
Tuaq Buling wah dateng leq bandara Soekarno-Hatta Jakarta leman Mentaram.

Cerite selanjutne....

Tuaq Buling kenoh lampaq solah apeq tandangne, jauq tas kance koper. Muqne peridup smartphone saq temateq oneq, maqlum lek atas kapal endeq tebeng peridup hape, takutne mengganggu komunikasi kapal unin. Sebenarne endah pramugari takutne te endeng nomer hapene kance takut tepoto endah. Hemz. Hehe.

Dimin dateng leq duah, uyut supir travel tawaran montor saq jaq muat. Puqne nyebrang tuaq buling lalo pesen tiket damri, ye lebih muraq menurutne. Biase tiket damri sekitar 40an dateng tengaq Jakarta. Bares terus taeq Taksi dateng hotel. Pukne taeq. Al-Hamdulilah endeqne ngutaq, biasen mun taeq engkel jaq ngutaqne soalne.

Konteq Cerite dateng Terminal Mangga dua, puqne entun taek taksi. Peritoqne supir taksi alamat hotelne leq layar smartphone canggih tie ceriten, lantong rurung-rurungne bis siqne peritoqne. E... Puas angenne, parapne endaqne sak tepegelining-lining siq supir taksi, nani lamun wah perengat google map tie jaq lilen senoh jaq begelut-gelut unin angenne. Beterusne lampaq Taksi tie.

"Habis ini belok kanan ya pak?" ongkat Tuaq Buling perenget supir taksi. "Ya, pak, masih macet ini". Jawab sopir taksino grogi.  Mungkin tumben araq penumpang cerewet apelagi ngajahan, biasen tedoq nurut embe lain montor lampaq. Ye wah nani ne, lantaran google map engkahne tao nipu-nipu sopir saq jahat.

"Mulen Jakartane jaq, siq macetne, bis umurte leq langan bae aneh, untung leq Mentaram jaq endeqne araq saq macet macet, apelagi nani wahne saq kepemimpinan bapaq Haji Ahyar Abduh, ehh, dateng gang bis te aspal. Al-hamdulillah aneh. Mudahan endeq macet maraq Jakarta." Unin Angen tuaq Buling. Enggakne taoqne girang macet leq mataram lekq jalur tame gunung sari. Laguq nani jaq bauan wahne saq tepinaqan jalur lain.

Mangkaq pedas ruen awet muda batur Lombok, gagah, inges solah-solah, soalne kakenan masih lueqan alami doang, polusi masih kurang. Iniqne bede 6-7 taun ruen bahkan puluan kance batur Jakarta. Misalne batur Lombok  Usia 35 maraq ruen 28 atawe 29 ruen. Syukur bae aneh ite batur Lombok saq lueq tebeng nikmat.

Ahirne dimin wah beloq kiri, beloq kanan, liwat jembatan, beloq kanan, beloq kiri liwat peken luruuuuus malik beloq kiri beloq kanan dateng leq Hotel. Al-Hamdulillah selametne tuaq Buling sampe Hotel. Megah gati ruen hotel saq jaqne taoq madeq tie. Tinggang, bulet-bulet model gedungne. Mun jaq tepedasan langan google earth jaq maraq ruen daun kacang langan atas.

Entun Taksi langsung maju jalan gagah. Tangkongne solah tuaq Buling. Te beli leq toko beleeeeeq gati,  hargen lumayan endah, 390an ribu, beli sekeq gratis sekeq ceriten. Sepatu bireng nyeleng mahel masih, tulisan aji 999 ribu. laguq tediskon aji 190an ribu sengaqne toko beleeq baru tie  nyangke promo ceriten.

Nanine dateng julun lawang hotel tie. Pedas wah ruen leq lobi hotel dengan pade gati ruen tangkongne. Padde. Ye tetu ne. Endeqke ngarang-ngarang.  Aneh langsungne grogi kaye tuaq buling, pure-purene mengkol joq kirian sekediq, dengan saq jaqne kance beselewanan tie grogi masih ruene. Pedas puteq muen ndaraq daraqne. Korban tangkong pade ruen.

Ye wahto langanne nyesel beli tangkong saq siqne kadu tie, saq iniq laloq pade ruen endah meno keloeq tangkong. Ye angkak mun bau jaq wayen araqante meli leq saq kodeq-kodeq bae tangkong daripadene saq tejejer kance selae maraq ruen dengan apel. Pasrah tamene leq resepsionis, masihne ngoang sedoqne laguq, tinjot saq pade ruen tangkongne.

Engetneq kejadian saq kuliah zaman laeq, wahne beli tangkong baru endah ceriten puqne kadun. Mare-mare pade endah ruen tangkongne kance batur laguq lain kelas. Ye wah langan trauma laloq saq pade ruen tangkongne. Masihne terase lilen saq laeq sampe nani. Pedas idapne. Uyang idap awaq maraq endeq genjah tanaq. Laguq lupaqan wah aneh masa lalu. Perengetan ojok batur-batur saq demen beli tangkong kembar. Sebenarne endeqne ngelilean mun saq tangkong warne puteq atawe bereng jaq. Laguq mun saq tangkong spesial, mahel, puq solah endah ye sak pade, ye saq ngelilean laoq.

"Buling Asmara, di lantai 32 ya". Ongkat resepsionis sambilne serah kunci elektronik.

Puqne taeq ceriten tuaq Buling joq ruanganne puqne istirahat. Begaq lelah idapne. Tangkong masih masih ambun kapal dait taksi. Baresne jaq mandiq besebur lelah laloqne.

Kocap ceriten aran Buling Asmara tie tebait langan Sandiwara Radio. Aran tuaq buling laeq tepenganaqan leq zaman nyangke ngetren sandiwara radio, maraq entan saur sepuh, tutur tinular, nini pelet, randu kalasan, pangeran jayakusuma. Untungne bae endeq aran Jaya Kusuma atau Arya Kamandanu. No, Retno Marlangen mule jaqne aran adiqne tuaq Buling, laguq untungne wah engkah zaman radio alias tame zaman RCTI ye puqne sugul adiqne. Jari burungne aran Retno Marlangen Adiqne.

Kurang lebih 4 Jelone leq Jakarta Tuaq Buling. Jelo terakhir puqne lampaq-lampaq. Lampaq naen joq saq rapet-rapet kance taeq taksi mun saq jaoq-jaoq. Endeqne lupaq tetep kadu google map. Untungne saq wah beli hape canggih tie puqne jok Jakarta.

Leq waktu saq juluan jaq masihne kadu hape bate, jari endeqne mauq befoto-foto. Laptop doang kadune befoto. Sengaje bukaq laptop leq bandara ye kadune selfie. Teparan lah siq dengan jaq nyangke bukakq ape jage atau jangke sibuq gati. Maqlum penampilan endah endeqne ngecewean laoq ruen. Mirip Profesor baret-baretno. Sengaq bulune leq julu endah wah bis gati. Ye puqne santer tunah nyonyahne saq tebel bulune jari perbaikan keturunan.

Endeqne lupaq belian inaq amaqne oleh-oleh kance nyonyahne.

Bersambung .......................  (Fiksi semata, hanya untuk hiburan)